#香香食好西 #nearD好西 #食在元朗 又係辣妹出動嘅時候💁🏻‍♀️ 聽聞元朗有間出名爆辣嘅撈麵，當然要挑戰吓～～見返呢種中學雞時代成日幫襯嘅冷麵店，好親切🤣🌝 🌶辣度有唔同程度揀，平時食開譚仔大辣完全無感嘅我今次試咗中辣，難得feel到有辣味😳 家姐仲食到不停要飲奶添🤣🤣🤣佢哋嘅辣香口唔麻，食起嚟好開胃，真心有驚喜❗️ 🥗爆撈小食 細撈 $38 用香甜粟米做base，撈埋韓式魚片、雞肉腸、蟹柳、蟹籽、魷魚同火腿丸，食材本身清淡，夾埋辣醬唔會過鹹👍🏻👍🏻 火腿丸紮實、粟米爽甜、蟹籽卜卜脆，咩口感都齊哂，難怪咁多人嗌！ 🍜100g蟹籽冷麵 $40 上過雜誌嘅招牌菜—— 4.5包冷麵加100g足料蟹籽，起碼三個人先食得哂。 麵質偏冧軟，反而同爽脆嘅蟹籽攞返平衡，冷涼感同蒜香充分刺激食慾，忍唔住一啖接一啖，咁大盒但食落唔飽滯。 🥢經典透明袋裝撈撈麵 $15/3包 那些年嘅經典小食，今時今日$15食得飽去邊度搵？ 同蟹籽冷麵唔同嘅地方係餸菜選擇較多，可以揀幾樣每樣試啲，啱哂眼闊肚窄人士。 📍爆辣冷麵 (元朗) 元朗又新街37-51號又一新城1樓F066號舖

#香香食好西 #nearD好西 #食在元朗 呢間打冷我諗元朗人都由細食到大，亦係我同兄弟啤啤嘅不二之選。 除咗歸屬感同親切感外，喺無點加價嘅情況下食物水準仍保持到，難怪平日晚上內外都滿哂座。 潮州嘢必食滷水鵝片$120，性價比極高，大大份，至少有14至16塊厚肉鵝片； 鵝片皮肉分明，冇多餘脂肪但又唔韌👍🏻 底下用豆卜墊底，如果係嫩豆腐就更好啦。 脆炸鹹豬手 $110 同樣碟頭大，豬皮炸到脆卜卜，食落唔鹹，唔會越食越口渴； 但脂肪略嫌多咗，有啲滯。 蠔餅反而麻麻地，粉咁重，入口偏油，唔夠乾爽鬆脆； 蠔仔大粒，但數量不多，有幾粒有啲腥。 📍 正記菜館 (元朗) 元朗金輝徑28號好盛洋樓地下4號舖

#香香食好西 #nearD好西 #食在尖沙咀 再次嚟到呢間位於小巷中嘅 居酒屋 ，雖然走港式風味，但都係與酒友輕酌小聚嘅好去處。 餐廳由開業至今始終如一，唔係唔創新，而係雞牛豬羊海鮮蔬菜早已一應俱全。 憑住香港地道手工啤，吸引不少香港人支持，基本上枱枱都人頭一枝，落單仲可以借啲咦講隻字抒解吓整日嘅工作壓力🤣🤣 串燒未到，已聞到孜然飄香。 牛舌（$68）厚肉爽脆，有嚼勁而不韌； 自家製雞肉串（$38@2）多肉肥美，雖未至於油水充分，但啖啖肉嘅口感依然帶嚟無窮滿足。 菜單有不同調味嘅焗蠔選擇。 黃金醬燒（$88@3）係以沙律醬同芝士烤焗，奶香濃郁，令廣島蠔口感更添油潤。 蠔身約姆指大小，原味道偏向淡口，加上調味又多重滋味🥰 每個廚出品嘅玉子燒（$39）各有千秋，呢度嘅質感偏紮實，唔會太甜，咸甜比例恰到好處。 大大層mozzarella 舖面，芝士怪表示加分！ 雖然無拉絲效果，但大大嚿芝士啪入口超級邪惡又滿足！！！ 再嚟多個燒芝士丸（$22），醬油燒香外層，令其更加香口，又中和咗芝士本身嘅膩，普通嘅芝士丸經過烤煉後變得不再平庸😈 最後當然要點返個蔬菜解解肉膩。 蒜蓉燒茄子（$49）喺串燒店絕不可少，表面滿滿嘅蒜蓉火候控制得好好，唔會過生，香而不辣口； 茄子一撕就離皮，又嫩又入味，水準滿分👍🏻👍🏻 📍串酒里 (尖沙咀) 尖沙咀山林道6號B舖 (漢國中心對面)

#香香食好西 #nearD好西 #食在元朗 早幾年朗屏站後只有住宅，四周一片荒蕪。 估唔到今時今日已改頭換面，不少商舖食肆進駐，發展成一個小區。 霓虹燈招牌閃耀奪目，作為真·香港人第一時間就俾呢間港式點心吸引住。 元朗區其實有唔少夜茶飲，但精緻嘅新式點心就唔多； 好似餐牌上嘅西多士、茄湯鮮竹卷、青咖喱鹹水角、牛油果春卷，令人不禁遐想新舊兩派可以擦出點樣嘅火花🤪款款都想試呀！ 普洱、香片、鐵觀音、壽眉盛惠$5/位，抵到爛，店員周不時埋嚟主動加水，服務滿分💯 點心一籠兩件，可以試多幾樣，啱哂伴侶嚟撐枱腳，飲茶唔再係一大群人嘅事。 燒賣王大大粒，面層係墨魚滑，爽口彈牙；內裡包有豬肉，兩種不同肉質軟嫩爽滑交雜，好食👍🏻 🥟菜苗餃比一般坊間嘅juicy，菠菜充滿水份，吸收哂鮮蝦嘅鮮味，比蝦餃又多咗個層次。 🍆茄子稔軟厚身，淋上燒汁同木魚更提鮮； 茄子釀咗蝦肉再炸，有啲似煎釀三寶，但食落又完全唔油，值得一試。 🫔春卷外皮炸得鬆化香脆，內餡為菠蘿、蘆薈、蜜桃同沙律醬，酸甜清爽，加上牛油果增添咗陣獨特嘅油香，不過6嚿得1嚿有，如果再多啲就更好🤣🙈 秋葵碧綠鮮嫩，爽脆無渣，配上芝麻醬，偏向日式感覺。 最尾嚟多件西多做甜品～ 菜如其名，一切開蛋黃流沙餡如瀑布湧出，邪惡爆燈😈 🥞西多士外皮金黃香脆，用咗薄方包同鹹香十足嘅流沙，比傳統煉奶花生醬食起嚟冇咁甜膩，更香口惹味。 估唔到飲茶都可以食到出色嘅西多，而且款款點心都即叫即人手製作，上枱熱辣辣👍🏻🥳🥳 呢間絕對值得一飲再飲‼️ 📍8號茶居 (元朗) 元朗宏業南街22號虹方地下3B號舖

#香香食好西 #nearD好西 #食在元朗 無論春秋秋冬，每隔一頭半個禮拜都要「圍一圍爐」治吓心癢🤪 呢度每款湯底都唔係湯咁簡單，每款都非常足料，細食嘅剩係嗌個鍋都夠飽！ 好似呢款酸菜魚（$288），酸菜相信有一斤之多，味道酸甜脆口，夏天食尤其清爽； 魚肉為龍躉片，上枱先開始滾熟，更能確保魚肉鮮嫩，唔怕煮到殘散爛。 鵝肝墨魚丸（$68@4）嘅配搭富有特色，彈牙唔在講，一咬落去即時品嚐到墨魚嘅鮮。 再咬多啖⋯⋯ 油油嫩嫩嘅鵝肝經加熱後轉化成半液態，緩緩流入口中，油香加上海產鮮味絲毫不突冗，反而更豐腴😳😳 牛舌（118）擺放成花胚狀🌹 厚切口感好有嚼勁，比牛肉爽脆，但又帶少少韌勁👍🏻👍🏻 建議淥半分鐘就夠，新鮮肉唔洗淥太耐以免太老☺️ 炸芋頭（$48）幾靚又無渣，經油炸過，拎嚟打邊爐都唔會溶哂，仲可以keep到爽脆口感。 以元朗區火鍋嚟講算係高價之選，但對比返食材質素係值嘅😉 📍 大滾友火鍋 (元朗) 元朗鳳攸南街9號好順利大廈一座地下G4-G5號舖

#香香食好西 #nearD好西 #食在屯門 餐廳主打即叫即製梳乎厘，另外亦有幾款簡單三文治、沙律、意粉選擇。 去得coffee shop，當然係為嘆靚啡而嚟。 是日點嘅兩杯咖啡都以cold brew為基底，選用嘅咖啡豆濃淡酸甘適中，口感順喉細滑，容易被大眾接受。 橘香冰搖咖啡 帶柑橘微香，有西西里咖啡嘅清新感，但又唔會令咖啡變酸。 後者提拉米蘇咖啡 更似一道甜點，一半black coffee一半cream，表面灑上可可粉，再以手指餅為點綴。 攪拌後入口豐盈，同Macchiato近似，唔好奶油嘅人可能會覺些少膩。 吞拿魚沙律主要為羽衣甘藍同紫椰菜，拌以經微燻嘅吞拿魚，調味偏淡，略加black pepper辟腥，整體中規中矩。 Tiramisu有驚喜，手指餅充分吸收咗espresso，咖啡味濃郁甘香，又無受潮變淋； 配上無額外加糖嘅mascarpone，鬆化與細滑口感交雜，係一道越食越上癮又唔會過甜嘅「甜點」🥰 壓軸嘉賓soufflé 登場✨ 莓果控見到都開心，顏色繽紛多彩，莓醬甜中帶酸，食起嚟更開胃。 梳乎厘空氣感同鬆餅嘅綿軟參半，有口感，唔會好似食空氣咁，值得一試👍🏻👍🏻 📍 PHI Coffee & Pancake (屯門市廣場) (屯門) 屯門屯順街1號屯門市廣場1期3樓Kiosk 02號舖

#香香食好西 #食在元朗 香港做東北菜嘅餐廳唔多，適逢媽咪生日加父親節提早慶祝，屋企人都中意特色地道菜，就決定試吓呢間開咗無耐嘅東北菜館。 餐廳門面同內部裝修都用上大紅色，充滿大中華味道，枱櫈亦順應風格選用木製品。 屬於新東北口味嘅菜式選擇並唔多，只有疙瘩湯、羊肉餃、一兩道烤羊等，其實大部份都係上海北京菜。 預先ｂｏｏｋ枱時已知會餐廳會帶蛋糕，同預留咗片皮鴨作驚喜，但攞枱時店員就大大聲問係咪留咗，即刻乜驚喜都無哂🥲🥲 服務態度一般，要招手幾分鐘先有人理，不過勝在上菜速度快，唔洗點等。 點咗幾道菜，每碟都大大份，價錢平，抵食。 🥟紅油抄手（＄４８＠１０隻） 餃皮算薄，正常菜肉餡，但紅油無咩辣味，如果辣啲會更香口惹味。 🥩東北肉皮凍（＄５２） 外在晶瑩剔透，能見到包裹住嘅豬皮塊，但筷子夾起易散，質感唔夠彈牙。 🍜麻醬冷麵（＄５８） 有辣有唔辣任均選擇，因為媽咪唔食辣所以揀咗唔辣，麵非常足料，配菜同肉絲多； 加上麻醬拌勻，冰冰涼涼嘅味道非常開胃，麵條粗幼適中彈牙，有咬口得嚟唔會太硬。 🍤咕嚕蝦仁（＄７８） 同樣抵食，第一次見真係有成廿幾隻蝦，而且唔係河蝦咁細隻，蝦仲多過啲青椒同菠蘿； 調味酸甜平衡，好開胃。 🦆片皮鴨（＄１６８＠半隻） 配有１２塊皮，上枱時仍然溫熱； 雖然未至於新鮮烤起，但鴨皮仍脆，加上皮肉分明不帶肥膏，口感唔錯。 扣分位係店員唔夠醒目，叫佢哋可以執枱上蛋糕，餐廳標明收切餅費＄５０，但收完真係剩係拎個蛋糕出嚟⋯⋯ 無幫忙插上蠟燭，本應放喺袋中嘅生日刀都遺漏，要提佢哋先喺廚房拎出嚟🤥🙄😪 睇在食物質素同性價比唔差嘅份上可以再戰，但唔會再係慶祝節日嘅選擇。 📍 老掌櫃東北菜館 (富達廣場) (元朗) 元朗西菁街23號富達廣場地下19-24號舖

#香香食好西 #nearD好西 #食在銅鑼灣 自從加入OL行列，每逢週五都習慣推卻一切交際，獨身一人飽餐一頓，犒賞呢星期嘅努力，同時享受真正屬於自己嘅時光。 雖然唔係真正OMAKASE格調，更似一般民營壽司店。 但食物質素絕對對得上價錢，晚市幾舊水去邊搵🤷‍♀️ 極上壽司拼盤 $250 先由淡味魚類食起，左口魚經火灸後逼出魚脂，入口即化，豐盈嘅油脂充斥整個口腔，絕對係今餐嘅MVP。 滿滿海膽比飯更多，非常足料，味道鮮甜不苦。 深海池魚味淡肉厚，口感獨特，爽脆中又有幾分柔嫩，令人一試難忘。 三文魚籽圓潤汁多，一咬開，內裡嘅汁液傾瀉而出，甘甜鮮美，絲毫不腥。 蔥同吞拿魚腩絕對係天作之合。 先讚揚師傅刀工，剁得極之細膩，令魚肉更嫩滑，亦令魚香擴散得更佳更濃厚👍🏻 📍 雲壽司 (聯成商業中心) (銅鑼灣) 銅鑼灣謝斐道506-508號聯成商業中心地下B號舖

#香香食好西 #食在銅鑼灣 #nearD好西 蠔癮又起，居然有間有生蠔任食嘅放題，拿拿聲book個位食餐勁🥴 +$118就可以升級任食海膽帶子同法國生蠔，法國蠔雖然體型偏瘦削，但海水味夠濃，唔洗加調味料都夠味。 個人更愛海膽帶子，爽甜嘅帶子開半，笑口中夾住軟滑鮮甜嘅海膽，忍唔住一口氣食咗幾粒🤤 難得呢個價位食到無苦味嘅海膽👍🏻 壽司選擇多不勝數，軍艦壽司卷物手卷幾乎想像到嘅配搭都有，剩係花之戀都有五款😲 好似呢款龍蝦沙律花之戀，面頭以龍蝦仔拌沙律醬代替往常嘅蟹籽，真係食到一隻隻嘅龍蝦仔🍤 呢間係中泰日fusion，飛天通菜、炒淮山、翠肉瓜牛柳粒，炒野夠火候，係略嫌油同濃味咗啲啲。 冷盤必點嘅拌海蜇同麻辣牛脷，前者甜辣口，非常爽身彈牙；後者稔軟香口，兩碟都相當惹味。 📍 瀛豐放題料理專門店 (銅鑼灣) 銅鑼灣駱克道491-499號京都廣場10樓

#香香食好西 #食在銅鑼灣 #nearD好西 蠔癮又起，居然有間有生蠔任食嘅放題，拿拿聲book個位食餐勁🥴 +$118就可以升級任食海膽帶子同法國生蠔，法國蠔雖然體型偏瘦削，但海水味夠濃，唔洗加調味料都夠味。 個人更愛海膽帶子，爽甜嘅帶子開半，笑口中夾住軟滑鮮甜嘅海膽，忍唔住一口氣食咗幾粒🤤 難得呢個價位食到無苦味嘅海膽👍🏻 壽司選擇多不勝數，軍艦壽司卷物手卷幾乎想像到嘅配搭都有，剩係花之戀都有五款😲 好似呢款龍蝦沙律花之戀，面頭以龍蝦仔拌沙律醬代替往常嘅蟹籽，真係食到一隻隻嘅龍蝦仔🍤 呢間係中泰日fusion，飛天通菜、炒淮山、翠肉瓜牛柳粒，炒野夠火候，係略嫌油同濃味咗啲啲。 冷盤必點嘅拌海蜇同麻辣牛脷，前者甜辣口，非常爽身彈牙；後者稔軟香口，兩碟都相當惹味。 📍 瀛豐放題料理專門店 (銅鑼灣) 銅鑼灣駱克道491-499號京都廣場10樓