#香香試伏 #防疫期無啖好食 之 #是日午餐 質素對唔上價錢 醬汁配唔到食材😖 🙅🏻‍♀️🙅🏻‍♀️🙅🏻‍♀️🙅🏻‍♀️🙅🏻‍♀️ 午餐偏愛西餐，感覺食物比茶記輕盈無咁飽滯。 Lunch set 有沙律意粉扒餐選擇，$158-258包餐湯，餐飲要另嗌，價位偏高。 是日為蕃茄忌廉湯，口感厚身稠密，茄膏味好重，無鮮茄嘅清新，味道偏酸。 黑麥包鬆軟，灑上松露茸，入口帶松露香，頗為驚喜，可惜鹽加得太多，整體偏鹹，淹沒咗原本嘅麥香。 鯰魚扒有兩塊，魚皮煎得香脆，但偏乾略腥； 旁邊橙色醬汁近似美式燒烤醬，幾惹味，但同魚肉唔算太夾； 另一種醬汁估計加咗羅勒，無咩味。 沙律墊喺魚身下，菜吸收魚油後更稔身香口，醬汁反而同蔬菜更相配； 水波蛋鹽落手太重，蛋白好鹹，勝在火喉恰到好處，蛋黃嘅流心爆汁口感扳回不少分數。 咖啡豆果香偏重，入口偏酸，無烘焙香，唔啱我口味。 環境尚算舒適，但呢個價錢對應呢個質素，應該無第三次。 🙅🏻‍♀️🙅🏻‍♀️🙅🏻‍♀️🙅🏻‍♀️🙅🏻‍♀️ #食在九龍城 #cafeceres

#香香食好西 #防疫期無啖好食 之 #中上環 區難得用心嘅酒吧set lunch😋 加上職員親切有禮嘅態度，忍唔住要寫返個好評推介吓～ ⚜️ 🐟煎海紅鮪魚柳 $118 充滿瑞典風味，外皮酥香薄脆，魚肉偏乾但唔散，配上加咗百香果嘅牛油汁，比一般坊間食到嘅清新香甜，有煥然一新嘅感覺🤩 伴碟以不添加糖嘅紫薯泥代替馬鈴薯，更健康有營。 午餐包餐湯沙律二擇其一，另加一杯茶啡，以同區嚟講相當貼地抵食； 雞胸沙律唔記得影，羅馬生菜伴沙律醋，加一片薄雞胸，輕盈開胃。 🍗水牛城雞翼 用咗雞髀肉位，啖啖肉，又唔洗‘倫’骨，唔怕失儀態～味道係正宗水牛城風味，充滿tabasco嘅辣香，濃郁惹味，送酒一流👍🏻 #食在中環 #canteen #nearD好西

#香香食好西 #防疫期無啖好食 之 #是日午餐 #酸菜魚 🍲 落雨濕濕濕氣重，最啱食酸辣袪濕💁🏻‍♀️ size分咗大中細，分別係$50、$80、$110，比市價平唔少，本來擔心會唔會俾得好少，但無諗過嗌細都幾足料👍🏻 一打開表面鋪滿魚片，至少有十幾片，大小同塊salami差唔多； 魚肉滑嫩，夾起略嫌易爛，無筋性，有些微細刺但可以咬碎。 底下只有大豆芽、酸菜、青瓜片三種配料，令湯底帶充分鹹酸，湯水呈米白色，口感厚滑，但魚味唔夠濃郁； 嗌咗最重嘅大辣，用嘅係黃色嘅小辣椒，都係食唔到有辣味🥺🥺 #食在元朗 #nearD好西 #雲來 #新北江