FI專欄｜「兩餸飯」遍地開花｜Louise 記得昔日在將軍澳堆田區返工，同事謔稱飯堂的「兩餸飯」為「頹飯」。前兩日與舊同事及財經大公關在上環食晏，經過蘇杭街赫然見到一條人龍圍住賣兩餸飯嘅鋪頭，情況蔚為奇觀。呢一、兩年經營「兩餸飯」舖頭如雨後春筍，今時今日竟成為人氣之選。何解？ 平過街市買餸 一邊食晏、一邊與這兩位朋友談及此長龍「兩餸飯」店，她們亦滔滔不絶， 還介紹另一家較高檔次，在永樂街的店鋪；謂有紅衫魚，紅燒肉及鼓汁白蟮等「上菜」，仲話傍晚時段有多款海鮮選擇，平過自己去街市買來自己煮，$100有四隻粉絲蒸扇貝咁話。 另一人又插嘴大讚兩餸飯有蔬菜食，好過茶餐廳成日俾啲豬扒、牛扒、雞扒、健康好多。 長江花園飯堂 喺中環返工嘅打工仔，真係好難「搵食」，即使在滙豐總行內，雖有員工canteen，但聽講味道唔及街外嘅「兩餸飯 」，但今時今日返中環寫字樓，你估人人有張枱你坐咩？有個locker就算偷笑啦，買左盒兩餸飯，office都無地方俾你食。所以長江中心後面嘅「長江公園 」，係中環人坐低食飯盒嘅好地方，總好過內地旅行團要「立食」兩餸飯嘅。 中環做OL想坐低食個晏唔係咁易，係擺花街附近，做七、八十蚊個餐嘅食肆經常大排長龍，所以好多中環上班一族，寧願坐三蚊叮叮去灣仔嘅茶餐廳醫肚，有得坐低食又化算好多。兩餸飯遍地開花，其實多少反映經濟內傷未復元氣。嗱，通關經濟就見真章了， 復活節期間尤甚，人人湧出外消費。有富貴老友收到酒店及會所經理電話，希望到來撐下場。   一餐晏抵十個飯盒 以前在高級食肆，不時見到年青金融才俊都幾捨得飲飲食食，仲邊食邊高談濶論炒乜幣、物幣又NFT；家陣爆哂煲仲邊有wealth effect呢？好似滾水淥豬腸咁縮哂水就有，加上通脹壓力乜都加價，打工仔都要慳住個荷包，一餐晏仔三嚿水，真係夠食十日兩餸飯喇。兩餸飯在全港各區遍地開花，呢啲咪市場力量。論性價比，撼得贏大家樂、大快活或者美心呢啲連鎖式快餐店㗎！ 註：專欄作者的觀點不代表本網立場。 Fortune Insight 聯乘 《華爾街日報》推出全新訂閱計劃「FI Prime Plus」，只需輸入優惠碼「FIP30free」，即可免費一個月暢讀《華爾街日報》全網內容和Fortune Insight大部份收費內容按此訂閱：prime.fortuneinsight.com/web/wsj Subscribe FORTUNE INSIGHT Telegram: bit.ly/2M63TRO Subscribe FORTUNE INSIGHT YouTube channel:bit.ly/2FgJTen #本地 原文連結：fortuneinsight.com/web/本地/4942470/fi專欄｜「兩餸飯」遍地開花｜louise

FI Prime Plus - Fortune Insight