FI專欄｜Co Co Bonds 清零 廢柴富二代首當其衝｜Louise 瑞士政府夾瑞銀（UBS）啃咗頻臨爆煲嘅瑞信（Credit Suisse），瑞士金融監管局FINNA發落，瑞信發行的160億瑞郎應急可換股債券（Contingent Convertible Bonds；簡稱 Co Co Bonds）可奉旨撇賬，咁揸住債券嘅投資者就一夜清零。瑞士政府此舉認股不認債，令唔少資深銀行家大開眼界，指出為咗推瑞信入ICU，拖長個死亡時間，政府毫無金融秩序可言，聽講呢鑊嘢令富豪家族辦公室（Family Office）損傷慘重。 收租佬思維出事 所謂Family Office，都是富豪聘請一班投資專家，為他們的資產增值，讓家族下一代長食長有。不過一線的金融人才鮮有去family office撈，因爲係family office做唔似得華爾街投行咁，有豐厚花紅來吸引專才。通常family office 投資專家最叻都是四出「格價」或「錬價」，而香港family office，好多時用「收租佬」思維來作投資決定，下下要有「yield」，好向老細交數，所以好容易因為「好息」而墮入去買債呢個陷阱，如遇上只懂吃喝玩樂之廢柴富二代，咁敗家就無難度。 恒大未平 瑞信又起 金融市場弱肉強食，去年底私人銀行家力sell客戶投資債券，甚至慫恿借錢買債。瑞信的Co Co Bonds清零，富豪旗下的family office首當其衝。中環八卦banker都四出打聽那個family office最重傷。 瑞信危機是計恒大爆煲後又再把富豪身家大洗牌。前幾年香港及大陸富豪貪高息，買入恒大永續債，債價愈跌個yield愈高，十幾廿厘息看似好sexy，誰不知賺息蝕價之餘仲要被銀行call loan，有些身家只剩低十分之一。 當心經濟墮胎 其實美國放棄金本位後，靠住印在美金上的幾粒字「In God We Trust」不斷印銀紙，前聯儲局主席格林斯潘（Alan Greenspan）90年代起以低息手段谷經濟，歷時二、三十年，以往低息環境下，透過借平錢來投資套利，一直如魚得水。可以預期通脹停不了，一加息之下，猶如經濟墮胎（Economic Abortion ），那些FTX Silvergate、矽谷銀行、瑞信等先後出事，只是經濟墮胎之徵兆。至於香港，當心債高之地產股。 註：專欄作者的觀點不代表本網立場。 Fortune Insight 聯乘 《華爾街日報》推出全新訂閱計劃「FI Prime Plus」，只需輸入優惠碼「FIP30free」，即可免費一個月暢讀《華爾街日報》全網內容和Fortune Insight大部份收費內容按此訂閱：prime.fortuneinsight.com/web/wsj Subscribe FORTUNE INSIGHT Telegram: bit.ly/2M63TRO Subscribe FORTUNE INSIGHT YouTube channel:bit.ly/2FgJTen #財經 原文連結：fortuneinsight.com/web/財經/4775417/瑞信-瑞銀-家族辦公室-債券

FI Prime Plus - Fortune Insight