林家謙成ViuTV頒獎禮大贏家 得獎感言網民反應大不同 ViuTV首個音樂頒獎禮《Chill Club推介榜年度推介20/21》喺噚晚圓滿結束，林家謙（Terence）一共奪得6個獎，分別係「Chill Club年度十大歌曲」、「Chill Club年度作曲人」、「Chill Club年度編曲」、「Chill Club年度唱作歌手」、「Chill Club年度男歌手金獎」及「Chill Club年度之歌」，成為全晚大贏家。雖然唔少人都覺得佢係實至名歸，不過佢喺講得獎感言時就話：「下？自己攞呀？咁隨便㗎咩？」結果引起部分網民不滿，紛紛留言話佢寸嘴同無禮貌。 林家謙首先憑《一人之境》獲得「Chill Club年度十大歌曲」，上台後司儀駱振偉就話：「自己嘅獎，自己攞」之後林家謙就回答話：「下？自己攞呀？咁隨便㗎咩？」亦有網民話見到佢用手指捽個獎座，不過就冇拎起獎座。 之後，林家謙再多次上台攞獎，連佢都話自己「老是常出現」，可能已經多次上台嘅關係，佢去到第四次上台時就話「冇乜嘢講」。之後就被部分網民話佢寸嘴同無禮貌，紛紛留言話： 「連基本做人的禮貌都冇。極度反感。」、「冇品，不能登大雅之堂」、「佢今晚做乜？串串貢，好冇禮貌」、「攞獎都覺得煩就唔好去啦」及「每一句說話動作都無禮貌可言，完全無尊重過個頒獎禮 想點？」等等。 不過都有唔少網民力撐佢，仲話佢只係唔擅長講嘢同埋唔習慣，例如「體諒下啦，一晚拎咁多個獎真係會嚇死」、「我一啲都吾覺林家謙串喎、佢作啲歌勁好聽把聲又特別、千奇吾好吾唱歌呀！」、「林家謙都係唔識講野既人 大家體諒佢啦」、「家謙，你唔洗咁驚喎，你係實至名歸，因為你d歌係好好聽，我地係投比你d歌，focus向你d歌度，而且你把聲都係好好聽，下年再黎就諗定得獎感受，就唔洗咁無語啦。」、「佢份人比較低調，拎咁多獎佢唔慣啫！」及「其實佢應該好緊張」等等。喺出席完頒獎典禮後，林家謙喺IG更新即時動態，喺相片嘅對話中佢就話：「其實我抹個獎係因為仲有啲消毒酒精係個獎度未散，驚會la傷..唔係有塵」 另外，喺頒獎典禮獲得「Chill Club年度女歌手」銀獎嘅Serrini，喺得獎感言都話：「我唔會亂講嘢㗎！我要學下啲冷靜嘅人講嘢...」雖然佢好似暗串緊林家謙，不過有網民喺佢Facebook留言話：「你個friend首 一人之境攞獎，佢多謝曲詞編監 恭喜Mami，首夢中人唱得好聽」，Serrini都有回覆話：「愛護家him，你我有責」 #viutv #林家謙 #本地音樂