身為一個唔睇韓劇嘅人，個人誠意推介《屍戰朝鮮》。一部將韓國古代同喪屍結合，改編自漫畫嘅電視劇。 暫時已播放嘅共有兩季，每季六集，每集約一小時。Netflix自家製劇集，更係韓國地區第一部自家製。 如果你鍾意喪屍嘅作品，應該都會睇過《Walking Dead》，但呢次喪屍並唔係個種好悠閑，靠聲音同味道行動。而係《屍殺列車》個種狂奔，比人類跑得更快，但只嗜人血人肉，唔會攻擊其他動物嘅類型。韓國喪屍真係好喪😂😂😂 因為原本係朋友極力推薦下睇，老老實實第一季第一集，真係好悶...為完整交代背景，文戲之多...但到第一集最後就終於出現高潮，如果你對呢種歷史文戲無咩興趣，第一集就唔洗專心觀看。 之後集數節奏都捉得幾好，新伙伴加入，場景推進，到第二季尾嘅大突破，都超引人入勝，後來嘅文戲都比較有火花。第三季唔知道會唔會係最終季，希望唔會爛尾。 而且好特別嘅係三男一女嘅主角團(?)，但只有一條明確嘅單向愛情線～係「個人想像中」係邸下是中意男人，大機會係武英；而永信係戰鬥機器，成功報仇加成功拯救人類前唔會愛上任何人；徐菲暗戀邸下，但自知成為唔到佢嘅女人，所以一直無明確拒絕府使大人。 Netflix重溫：netflix.com/title/80180171 #劇評 #劇集開箱 #開箱 #煲劇 #屍戰朝鮮 #Netflix #韓劇 #李屍朝鮮 #Kingdom #킹덤