Microsoft 擬合法繞過 App Store 將於 iOS 平台推 Web 版 xCloud 早前同大家報導過，Microsoft於iOS平台試圖推出自家雲端遊戲平台xCloud，但就因為App Store嘅規例一直未能成事。不過所謂你有張良計，我有過牆梯，你App Store唔畀我隻App上架咩？我就推出Web版，咩呀！ 據《The Verge》引述知情人士，指Microsoft已下定決心開發xCloud嘅iOS及iPad OS Web版，亦即透過瀏覽器直接向用家提供服務，由於過程中唔需要下載任何App，自然就冇需要理App Store嘅審查規例。而據《Business Insider》報導，Microsoft遊戲部主管Phil Spencer於日前嘅內部會議中，向員工承諾「一定會登上iOS平台，預計2021年推出Web版服務」。 xCloud目前為Microsoft訂閱服務「Game Pass」嘅一部份，簡單講就係用家使用任何可以上網嘅裝置，就可以玩Game Pass遊戲庫嘅內容，一句講哂就係所謂「雲端遊戲」。 事實上Microsoft轉推Web版都唔係咩新諗頭，Amazon早前宣佈旗下雲端遊戲「Luna」都會用Web版方式登陸iPhone；而Google嘅Stadia亦已經能夠於PC及Mac機 (但iPhone及iPad唔得) 使用Chrome遊玩。換言之各大雲端遊戲平台都係使用Web版黎避開App Store嘅審查規例。 早前Apple指，如果廠商要於App Store推出雲端遊戲App，就要將遊戲庫內所有遊戲逐個提交予Apple審查。而Android方面則無此問題。 #XCLOUD #Microsoft